2022 жылдың күзінде Қостанай облысы Әулиекөл ауданындағы Аманқарай орманы алапат өртке оранып, жақын маңдағы елді мекендерде жүздеген үйдің түгі қалмай жанып кеткен болатын.

Жергілікті «Тобылинфо» ақпарат агенттігінің жазуынша, Осы іске қатысты Әулиекөл ауданының соты өртке тракторшы Александра Репейконы кінәлі деп тауып, оны шартты түрде бір жылға соттаған.

Айта кетейік, қылмыстық істі Бас прокуратураның өзі тергеген болатын.

Әулиекөл аудандық сотының мәліметінше, Александра Репейко өзінің кінәсін мойындаған және аудандық прокурормен келісім жасасаған. 44 жастағы тракторшыға қатысты сот үкімі 2022 жылдың 22 желтоқсанында шыққан.

«Сот үкіміне сенсек, 2022 жылдың 2 қыркүйегінде түскі сағат 13:45 шамасында Бағаналы ауылында жүрген ағаш өңдеуші Р.Есмағанбетов есімді азамат бұрын өзі танымайтын А.Рапейко есімді тракторшыға келіп, Бағаналы ауылынан «Басаман орман шаруашылығының» №22 Кондратьев орман шаруашылығына дейін жүрмейтін вагон жеткізіп беруін өтінген. Ол үшін Есмағанбетов тракторшы Рапейкоға ақша беремін деген. Рапейко ақша тапқысы келіп, оның ұсынысын қабылдаған», – деп жазады дереккөз.

Алайда, сот үкіміне сенсек, Рапейконың мініп жүрген Р 183 АСЕ мемлекеттік нөмірі бар «МТЗ-82» маркалы тракторында қауіпті ақау болған. Бір сөзбен айтқанда, оның тракторының майы ағатын, ұшқын сөндіретін құрылғысы болмаған, түтін шығаратын мұржасы қатты қызып кететін.

«Сол күні сағат 14:35 шамасында Рапейко даладағы 38 градус ыстыққа, орман маңындағы шөптің құрғап, жел тұрғанына қарамастан, ұшқын сөндіретін құрылғысы жоқ трактормен Бағаналы ауылына қарай жол тартқан. Ауылға бара жатқанда ол көп бұрылысты жолмен жүрген. Шоқ сөндіретін құрылғысы жоқ екенін біле тұра ол айналасындағы ормандардың маңымен жүрген. Осылайша, трактордың моржасынан шыққан шоқ «Басаман орман шаруашылығы мекемесінің» Кондратьев орман шаруашылығы айналасындағы құрғақ шөпке шоқ тиіп, өрт басталған», – делінген сот үкімінде.

Осылайша, 39 772,4 гектар орманды жоқ қылып, 18 774 283 323,73 теңге көлемінде шығын келтірген өрттің басталуына кінәлі тракторшы бір жыл шартты түрде бас бостандығынан айырылып, ешқандай өтемақы төлемейтін болды.

«ТобылИнфо» сондай-ақ, осы қылмыстық іске қатысты әлі уақытша қамау изоляторында отырған Басаман орман шаруашылығының директоры Асхат Жақашовқа қатысты тергеу әлі аяқталмағанын жазып отыр.

«Тағы бір маңызды жайт, тракторшыға қатысты сот отырысына басты зардап шегуші тарап – облыс әкімдігіне қарысты табиғи ресурстар басқармасының басшылығы келмеген. Алапат өрт басталған кезде осы мекемені басқарып отырған Мұрат Шаимов өз еркімен жұмыстан кеткені белгілі», – деп жазады дереккөз.

Ал, әлі тергеуде отырған Жақашевтың адвокаты болса тракторшыға қатысты қылмыстық істің отырысына басты күдіктілердің бірі – Жақашев шақырылмағынын айтып, дабыл қаққан, деп жазды Azattyq Ruhy.

«Мен Жақашовтың адвокаты ретінде тракторшы Рапейкоға қатысты қылмыстық істің осылай қаралып кеткеніне және менің қорғауымдағы Жақашовтың сотқа тіпті шақырылмағанына қатты наразымын. Оның үстіне, Рапейкоға қытсыт шыққан сот үкімін аяқ асты бір жерден біліп қалдым. Сондықтан, сот пен прокуратураға қояр сұрағымыз көп»,- дейді адвокат Сабыржан Иманбаев.