Ұлттық құрылтайдың алғашқы жиыны Ұлытауда өткелі де біраз уақыт өтті. Бұл жоба қаншалықты тиімді? Коммуникация құралына айнала алды ма? Көпшілікті бұл сауалдың алаңдататыны белгілі.

Расында, қазір Ұлттық құрылтай елдің өтініш-тілектерін жинайтын коммуникацияның әртүрлі форматын пайдалану арқылы ашық әрі тиімді диалог алаңына айналып келеді. Бұл жөнінде Мемлекеттік кеңесші Ерлан Қарин өзінің Телеграм каналына жазды.

Мемлекеттік кеңесші: «Ұлттық құрылтай – Президент жанындағы негізгі консультативтік-кеңесші орган. Мемлекет басшысы бұл ұйымды құру туралы бастаманы өткен жылғы Жолдауында көтерген болатын. Ұлттық құрылтайдың құрамына елімізге белгілі қоғам қайраткерлері және сарапшылармен қатар, өңірлердегі азаматтық қоғамның белсенді өкілдері мүше боп кірді. Қазіргі уақытта Ұлттық құрылтай Мемлекет басшысының қоғам белсенділерімен және сарапшылармен арадағы тікелей диалогын орнатып, оны дамытып отыр. Мысалы, бүгін Президент Ұлттық құрылтайдың мүшесі, Қолданбалы этносаяси зерттеулер институтының директоры Талғат Қалиевпен кездесті. Кездесуде сараптамалық құрылымдардың жұмысы мен қолданбалы зерттеулер жүргізуге қатысты мәселелер талқыланды. Бұған дейін Президент Ұлттық құрылтайдың Т. Әубәкіров, С. Ақылбай, Ә. Байменов, Р. Баталов, Б. Ізмұхамбетов, Ж. Күлекеев, С. Худяков, И. Салжанов, Д. Тұрлыханов секілді басқа да мүшелерімен дәл осындай кездесулер өткізген болатын», – деді.

Былтырдан бері Quryltai мобильді қосымшасы іске қосылған-ды. Бұл қосымша желтоқсан айынан бастап, жүзеге асырылды. Бұл платформаға кез келген азаматтар өз ойлары мен ұсыныстарын жолдай алады.

«Бұдан бөлек, «Хабар» телеарнасында «Ұлттық құрылтай» атты арнайы бағдарлама көрсетіледі. Оған әр кезде әртүрлі өңір қосылады. Бағдарламада Ұлттық құрылтай мүшелері мен сарапшылар елімізді дамытуға ықпал ететін ұсыныстарды талқылайды. Солайша, Ұлттық құрылтай елдің өтініш-тілектерін жинайтын коммуникацияның әртүрлі форматтарын пайдалану арқылы ашық әрі тиімді диалог алаңына айналуда», – деп жазды Ерлан Қарин.

Кез келген ұсыныс маңызды. Қоғамдағы өзекті мәселелерді де талқылауға таптырмайтын алаң болары сөзсіз. Сол себепті де азаматтардың өз ойын, ұсыныстарын, талап-тілектерін Quryltai мобильді қосымшасы арқылы жолдауына болады.