Қазақ боксшысы Данияр Елеусінов (12-0, 7 КО) АҚШ-тың Вашингтон қаласында өткен кәсіби бокс кешінде жұдырықтасты.
Елеусінов филиппиндік боксшы Джеймс Бэконмен (26-5, 17 КО) жекпе-жек өткізді. Кездесу жартылай орта салмақта өтті және сегіз раундқа жоспарланған болатын. Алайда жекпе-жек толық өтпеді: Данияр екінші раундта техникалық нокаутпен жеңіске жетті.
Осылайша, Данияр Елеусінов кәсіби мансабындағы он үшінші жеңісіне қол жеткізді, ал Джеймс Бэкон алтыншы рет жеңілді. Айта кетейік, бұл Елеусінов үшін АҚШ-тағы соңғы бес жылдағы алғашқы жекпе-жек болды. Ол соңғы рет Штаттарда 2020 жылдың қарашасында намибиялық Джулиус Индонгоны (24-10, 13 КО) нокаутқа түсірген еді.
