Bild басылымының хабарлауынша, әйгілі неміс бапкері Йоахим Лёв Өзбекстан ұлттық құрамасының бас бапкері қызметін қабылдамау туралы шешім қабылдады. Келіссөздер Германиядағы Өзбекстан елшілігінің көмегімен жүргізілгенімен, ел футбол қауымдастығының ресми басшылығымен тікелей байланыс орнамаған.
«Лёв бірнеше күн бойы бұл міндетті мойнына алуды байыппен ойластырды. Алайда, соңында достық пейілмен бас тартты», — деп жазады басылым.
Шілде айының ортасында Лёвке қазіргі бас бапкер Тимур Кападзенің орнына келу ұсынылғаны белгілі болды. Кападзе басқарған команда әлем чемпионатының іріктеу кезеңіндегі төрт шешуші матчта өнер көрсетіп, ел тарихында алғаш рет финалдық кезеңге жолдама алған. Бұл жаңалық жанкүйерлер арасында екіге жарылған пікір туғызды: бірі Кападзеге сенім білдіруді қолдаса, екіншілері атақты шетелдік маманды көруге ниет білдірді.
«Ферғана» агенттігінің дерегінше, Лёв Өзбекстан және Орталық Азия футболының ерекшеліктерін білетін мамандармен бірнеше кездесу өткізіп, елдегі футбол ахуалы туралы толыққанды пікір қалыптастырған.
Йоахим Лёв 2014 жылы Германия құрамасын әлем чемпионы атандырды және ФИФА нұсқасы бойынша әлемнің үздік бапкері атағын иеленді. Ол 2021 жылдың наурызында ұлттық құраманы тастап кеткеннен бері бапкерлікпен айналыспаған.
