Әнші Алла Пугачёва Ресей азаматтығынан бас тартты деген мәлімет бар, ол осыған қатысты құжаттарды Израильдегі РФ елшілігіне тапсырған, деп хабарлайды Arasha.kz.
Ресейлік Telegram-арналардың хабарлауынша, бұл рәсім бөгде адамдарсыз, жабық түрде өткен, ал әртіс ғимаратқа бөлек кіреберіс арқылы кірген. Құжаттарды қарау бірнеше айға созылуы мүмкін, бірақ кейбір жағдайларда бұл процесс жылдамырақ жүреді.
Дереккөздердің айтуынша, әншінің мұндай қадамға баруына Ресейде оның үстінен қылмыстық іс қозғалуы мүмкін деген қауіп себеп болған. Еске салайық, 2022 жылы Пугачёва Израиль азаматтығын алған және Украинадағы соғыс қимылдарына қарсы шыққан.
Сонымен бірге, Федералдық қауіпсіздік және сыбайлас жемқорлыққа қарсы күрес жобасының (ФПБК) жетекшісі Виталий Бородин «Страсти» сайтына берген пікірінде бұл ақпараттың, үлкен ықтималдықпен, фейк екенін айтты. Оның сөзінше, Пугачёва Украинадағы қақтығыс аяқталғанға дейін Ресей паспортынан бас тартпайды, өйткені өзге шетелге кеткен әртістер сияқты елге оралсам деп үміттенеді.
Бородин ресми мәлімдемелерді күтуге шақырды және мұндай фейктер әншінің имиджін жақсарту үшін әдейі таратылуы мүмкін екенін атап өтті, осылайша ол жағдайды өз пайдасына жаратып, өзін отаншыл кейіпте көрсете алады.
