Париж Олимпиадасының күміс жүлдегері, грек-рим күресінің шебері Демеу Жадыраев көптен күткен қуанышын желідегі парақшасында бөлісті, деп Arasha.kz тілшісі Sportinside.kz сайтына сілтеме жасап хабарлайды.
Спортшы Instagram-дағы ресми аккаунтында тұңғыш қызы Дана есімді перзентімен түскен суретін жариялады.
Демеу Жадыраевтың анасы Күлипа Бижанова бұған дейін берген сұхбаттарының бірінде баласының алғашқы сәбиін ұзақ жылдар бойы күткенін айтқан болатын.
"Бішкекте Олимпиадаға жолдама ұтып алды. Сол жарысқа барғанда келінім босанып, немерелі болдым. Демеудің бес жыл күткен тұңғышы – Дана қызым өмір есігін ашты. Немеремнің аяғы алтын! Демеудің Париждегі жетістігі – немеремнің несібесі. Асыға күткен немереміз әкесінің жолын оңғарып, жетістікке жетуіне септігін тигізді", – деген еді Күлипа Бижанова.
