Келеңсіз жағдай биыл наурыз айында болғанын қалалық соттың баспасөз қызметі мәлімдеді, деп хабарлайды Arasha.kz.
Мектеп-лицейдің оқушысы сабаққа кешігіп қалған болуы мүмкін, ол сыныптың есігін қатты әрі үздіксіз қаққан. Ал мұғалім, шамасы осыған ашуланып, оны бірнеше рет ұрған. Іс материалдарында денсаулыққа елеулі зиян келтірілгені көрсетілмеген, дегенмен жасөспірім оқушы физикалық ауырсыну сезінген.
Оқушының анасы мұғалімді кешіруге келіспей, полицияға арыз жазған. Педагогқа кәмелетке толмағанға денсаулыққа жеңіл зиян келтірмейтін, бірақ физикалық ауырсыну тудырған соққы жасағаны үшін айып тағылды.
Бұл бап бойынша жаза ретінде 100 АЕК-тен жоғары айыппұл, не қоғамдық жұмыстар, сондай-ақ 30-дан 50 тәулікке дейінгі қамау көзделген.
Шымкент қаласының қылмыстық істер жөніндегі ауданаралық соты мұғалімді қылмыстық құқықбұзушылық жасауда кінәлі деп таныды. Ол да өз кінәсін мойындап, өкінетінін білдірді. Жаза ретінде оған 25 тәулік қамау белгіленді. Үкім заңды күшіне енген жоқ және шағымдануға болады.
Жаңа оқу жылы қарсаңында бұл барлық мұғалімдерге эмоцияны бақылап, оқушылардың ең алдымен біреудің баласы екенін ұмытпау туралы жақсы ескерту. Сондай-ақ Қылмыстық кодексті сақтау қажет.
Дегенмен резонанс тудыратын жағдайлар жиі болып тұрады. Соңғы мысалдардың бірі – шымкенттік «Парасат» колледжінде орын алған оқиға. Онда тәрбие ісі жөніндегі меңгеруші екі студентке, оның біреуі кәмелетке толмаған, «жазалау шарасын» ұйымдастырған. Ол да кінәлі деп танылып, қызметінен айырылды.
