Шалқар ауданында «Ұлы Борсық» коммуналдық кәсіпорнының қызметкерлері жалақының кешіктірілуіне шағымданып, Тоқаевқа видеоүндеу жолдады, деп хабарлайды Arasha.kz.
Адамдар ақшаның үнемі кешіктіріліп төленетінін, зейнетақы және медициналық жарналардың айлар бойы аударылмайтынын айтты. Жұмысшылардың сөзінше, тамаққа ақшалары жоқ, азық-түлікті қарызға алуға мәжбүр.
«Жалақымызды үнемі бір жарым ай кешіктіріп береді. Зейнетақы қорына және медициналық сақтандыруға ақша жеті-сегіз ай бойы аударылмайды. Демалыс ақшасын да кешіктіріп төлейді. 2019 жылы айлық өсірілді, бірақ бұл ақша бізге жеткен жоқ.
Аудит болды — 190 млн теңге көлемінде заңбұзушылықтар анықталды, бірақ белгісіз себептермен іс жабылып қалды. Зиянды еңбек жағдайында бізге сүт те, арнайы киім де берілмейді. Кәсіподақ та еш көмектеспейді. Біз заңдылықты қалпына келтіріп, кәсіпорынға тексеріс жүргізуді талап етеміз», — деді қызметкерлер.
Олардың арасында көпбалалы отбасылар да бар.
«Поликлиникаға барсақ „Ақша түспеді“ дейді. Содан қабылдамайды. Бәрімізде кредит бар, оны уақытында төлей алмай отырмыз. Менің үш балам бар, әйелім төртіншісіне жүкті», — деді жұмысшы Серік Ахметов.
Аудан әкімі аппараты бұл мәселені мойындады. Шенеуніктердің айтуынша, шілде айының жалақысы қыркүйек айының басында толық төленеді, ал тамыз айыныкі — айдың ішінде беріледі.
Қызметкерлерге кәсіпорынның ауыр қаржылық жағдайына байланысты сыйақы берілмейді.
