Абай облысындағы түзету мекемелерінің бірінде жазасын өтеп жатқан 53 жастағы азамат алғаш рет партаға отырып, білім алмақ, деп хабарлайды Arasha.kz.
Өзінің айтуынша, ата-анасы ішімдікке салынып кеткендіктен, ол бала кезінен екі қарындасын бағып, ерте еңбекке араласқан. Өкінішке қарай, жастық шағы түрмеде өткендіктен мектепке баруға мүмкіндігі болмаған.
Polisia.kz мәліметінше, қазір бұл түзету мекемесінде №2 жалпы білім беретін орта мектептің қолдауымен 21-53 жас аралығындағы сотталғандар оқу мүмкіндігіне ие. Солардың ішінде алғаш рет партаға отырған 53 жастағы азаматтың тағдыры ерекше назар аудартты.
- Балалық шағым еңбекпен өтті, қарындастарымды бағуға тура келді. Әке-шешем ішімдікке салынып кеткендіктен, мектепке апарған да жоқ. Жастық шағымның көбі түрмелерде өтті. Қазір ойланып қарасам, білім алғанда тағдырым мүлде басқа болар еді. Бірақ “ештен кеш жақсы” дейді ғой, – деп ағынан жарылды ол.
Ал қамау мекемесінің басшысы Жеңісбек Дәуренбековтың айтуынша, білім – сотталғандарға түрмеден шыққаннан кейін жаңа өмір бастауға жол ашатын үлкен мүмкіндік.
