Қазақстандықтарға кешкі уақытта кір жуғыш машинаның немесе шаңсорғыштың шуынан айыппұл салынуы мүмкін, деп хабарлайды Arasha.kz.
Информбюроның мәлімдеуінше, көршілердің көпшілігі «тыныштық режимін» бұзған жағдайда учаскелік полицияға шағымдануға құқығы бар екенін біле бермейді.
Қарапайым шаңсорғыштың шуы – шамамен 70 децибел. Қазақстанда «тыныштық сағаттары» туралы заң бар. Сондықтан сағат 22:00-ден кейін шаңсорғыш қолдануға болмайды — бұл заң бұзушылық болып саналады. Үйді жинағыңыз келсе, таза еден емес, шамамен 30 мың теңге айыппұл алуыңыз мүмкін.
Санитарлық нормаларға сәйкес, күндіз тұрғын үйлерде рұқсат етілетін шу деңгейі – 55 децибелге дейін. Түнгі уақытта және «тыныш сағатында» — 40 децибелден аспауы керек. Салыстыру үшін айтсақ, бұл – кәдімгі әңгімелесу деңгейі. Бірақ шаңсорғыш сияқты тұрмыстық құрылғылар әлдеқайда қатты дыбыс шығарады.
«22:00-ден таңғы 9:00-ге дейінгі жұмыс күндері, 23:00-ден 10:00-ге дейінгі демалыс және мереке күндері шуға жол берілмейді – бұл біздің кодекстің негізгі талабы. Көбіне адамдар құрылыс алаңдарынан шыққан шуға шағымданады», - дейді Алматы қаласы санитарлық-эпидемиологиялық бақылау департаментінің коммуналдық нысандарды бақылау бөлімінің басшысы Гүлжан Қилыбаева.
Жыл басынан бері Алматыда тыныштықты бұзғаны үшін 550-ден астам адамға айыппұл салынған. Алғашқы рет тәртіп бұзғандарға 10 айлық есептік көрсеткіш (шамамен 40 мың теңге) көлемінде айыппұл қарастырылған. Егер жыл ішінде қайталанса, айыппұл екі есе өсіп, 20 АЕК-ті құрайды. Дегенмен алдын алу шараларына қарамастан, ереже бұзушылардың саны азаймай отыр.
«Қазақстанның Әкімшілік кодексінде тыныштықты бұзғаны үшін норма бар. Бұл – 437-бап. Заң бойынша барлық даңғырлаған жөндеу жұмыстары, қатты музыка және азаматтардың тыныштығын бұзатын кез келген әрекет тыйым салынған», - дейді Алматы қалалық полиция департаментінің ресми өкілі Салтанат Әзірбек.
Көршілердің барлығы бірден учаскелікке шағымдана бермейді. Әдетте дау-жанжалдар тұрғындар чатында шешіледі. Дегенмен ережелерді біліп, бұзбаған жөн.
