Сыртқы істер министрінің орынбасары Әлібек Бақаев журналистердің Мұрат Нұртілеудің қызметтен кетуі туралы сұрағына жауап берді, деп хабарлайды Arasha.kz.
Журналистер бұл отставка президенттің жуырдағы Нью-Йоркке сапарымен және қазақстандық делегация құрамындағы кәсіпкерлердің аздығымен байланысты ма, деген сауал қойды.
— Біздің сапар Бас ассамблеяға қатысты болды. Кәсіпкерлер – ол бөлек, бизнеске қатысты іс-шаралар. Кәсіпкерлердің құрамы қаншалықты сапалы болды – оны мен айта алмаймын. Маған СІМ қалыпты жұмыс істегендей көрінеді. Сіз менен қандай баға күтесіз? Бұл БҰҰ-ның 80 жылдық мерейтойлық сессиясы болды. Мемлекет басшысы қатысты, жақсы баяндама жасады. Мұнда пікір білдірудің өзі қажетсіз сияқты», - деді ол.
Сондай-ақ ол сізге, Сыртқы істер министрінің орынбасары ретінде, ешқандай ескерту не сөгіс жасалған жоқ па?, деген сауалға жауап берді.
— Жоқ, мүлде болған жоқ. Ешқандай. Министрлерді тағайындау туралы шешім – ел басшылығының құзыретінде. Шешім қабылданды. Бұл бірінші де, соңғы да министр емес», - деді Әлібек Бақаев.
