Елімізде жануарларды циркте қолдануға тыйым салуды және хайуанаттар бағын кезең-кезеңімен жануарларға арналған паналау орталықтарына айналдыруды талап еткен онлайн петиция пайда болды, деп хабарлайды Arasha.kz.
Құжат авторлары мұндай мекемелердің басты мақсаты ойын-сауық емес, жануарларды оңалту болуы тиіс деп есептейді.
«Жануарларды үйретуге және онымен өнер көрсетуге толықтай тыйым салуды, жаңа хайуанаттар бағы құрылысына мораторий енгізуді, үш-бес жыл ішінде жануарларды арнайы паналау орталықтарына, соның ішінде халықаралық орталықтарға тапсыруды, цирк пен зоопарк қызметкерлеріне жаңа мамандық игеруге қолдау көрсетуді сұраймыз», — делінген петицияда.
Бастамашылар әлемдік тәжірибеге сүйенеді. Еуропаның көптеген елдерінде жабайы жануарлардың өнер көрсетуіне тыйым салынған, ал дәстүрлі зоопарктерді анағұрлым гумандық үлгілер алмастыруда.
