Мәжіліс депутаты матчтан алған әсерінің теріс болғанын айтып, жанкүйерлерді стадионға кіргізу ісін жеделдетуді СОБР қызметкерлерінен талап етуге мәжбүр болғанын жеткізді, деп хабарлайды Arasha.kz.
Бақытжан Базарбек өзінің әлеуметтік желідегі парақшасында кеше өткен «Қайрат» пен «Реал Мадрид» арасындағы ойында билетпен келген жанкүйерлердің ішке кіре алмай, үлкен қысым (кептеліс) болғанын, оның ішінде балалар да қалып қойғанын жазды. Сонымен қатар ол «Қайрат» – «Реал Мадрид» матчы үшін «Самұрық-Қазына», «Бәйтерек» холдингтері мен ұлттық компания қызметкерлері сатып алған 5 мың билетке қатысты мәселені көтеріп, олардың жеке қаражатқа әлде бюджет есебінен алынғанын тексеруді талап етті.
«Бұл іс-шара өте нашар ұйымдастырылған. СОБР, ІІМ және ішкі әскерлердің едәуір күші сол жерде болғанымен, олар іс жүзінде ештеңе істемей, жай ғана тұрды. Олар көрермендерді стадионға тезірек кіргізуге көмектесе алар еді», – деп атап өтті Бақытжан Базарбек.
Мәжілісменнің айтуынша, ұйымдастырушылар кезекте көптеген билетсіз адамдар тұрғанын алға тартып ақталған. Алайда тәртіп орнату үшін дауыс күшейткішті пайдаланып, жанкүйерлерден билеттерін көтеруді сұрау жеткілікті болатын. Депутат футбол ойыны 21:30–21:45-те басталғанын, ал көптеген жанкүйерлер стадионға ойын басталғаннан кейін, тіпті 15 минуттан соң ғана кіргенін айтты.
«Журналист Михаил Козачков та ұйымдастыру деңгейінің төмен болғанын атап өтті. Оған қоса, билеттердің бағасы шектен тыс қымбат еді. Көп ақша төлеген адамдар ең болмағанда минималды жайлылықты күтті. Бірақ ол қамтамасыз етілмеді. Жеке өзім СОБР қызметкерлері мен ұйымдастырушыларға жанкүйерлерді кіргізуді жеделдетуді талап етіп айқайлауға мәжбүр болдым. Олар тыңдады ма, жоқ па – белгісіз. Бірақ футбол кешінен алған әсерім өте теріс болды», – деп жазды депутат.
Сонымен қатар ол матчта билетсіз адамдардың көп болғанын, олардың өткелдерде отырып алғандықтан, өз орындарына өту мүмкін болмағанын жеткізді.
Базарбектің айтуынша, «Қайрат» алғаш рет Чемпиондар лигасы деңгейінде ойнап отыр. Сондықтан футбол саласының функционерлері тек ойында жоғары стандартты емес, сонымен бірге жанкүйерлер үшін жайлы әрі қауіпсіз ұйымдастыруды да қамтамасыз етуі керек еді.
«Алда кемінде үш ішкі ойын бар. Үміттенемін, «Қайрат» футбол клубы мен Алматы әкімдігі қорытынды жасап, билеттерге ақша төлеген жанкүйерлер үшін ең бастысы – жайлылық пен қауіпсіздікті қамтамасыз етеді», – деді депутат.
Сонымен қатар Бақытжан Базарбек мемлекеттік органдарға «Самұрық-Қазына», «Бәйтерек» және ұлттық компаниялар қызметкерлерінің 5 мың билет сатып алғаны туралы ақпаратты тексеруді талап етті.
Оның айтуынша, бұл жерде принципті мәселе бар: билеттерді жаппай сатып алу қызметкерлердің жеке қаражатына ма, әлде мемлекеттік ресурсқа ма жасалды? Депутат бюджет қаржысын мұндай мақсаттарға пайдалану мүлдем жол берілмейтінін ерекше атап өтті.
«Сонымен бірге құқық қорғау және монополияға қарсы органдардан билеттерді алыпсатарлық схемалары бойынша тексеру жүргізуді, оларды жаппай сатып алған адамдар мен компаниялардың шеңберін анықтауды және кінәлілерді жауапқа тартуды сұраймын. Қымбат бағаға билет алған адамдар адалдық пен ашықтықты көруге құқылы. Жасанды тапшылық пен көлеңкелі схемаларға емес», – деп қорытындылады Бақытжан Базарбек.
