Донецк облысының Славянск қаласында Ресейдің әскери барлау қызметіне (ГРУ) жұмыс істеген агент әйел әшкереленіп, қолға түсті. Бұл туралы СБУ 3 қазан, жұма күні мәлімдеді, деп хабарлайды Arasha.kz.
«Жаудың сыбайласы – Славянскінің майданға жақын маңдағы дүкенінде жұмыс істейтін 53 жастағы сатушы болып шықты. Ол аймақтың толықтай оккупациялануын күтіп жүрген. Ресейлік ГРУ-дың назарына әйел қалаға жасалған соққылардың салдарын Телеграм-арналарға «жүктеп» жүрген кезінде іліккен», – делінген хабарламада.
Құпия қызметке тартылғаннан кейін әйел жараланған Қарулы күштер жауынгерлері емделіп жатқан медициналық мекемелерді анықтауға тырысқан. Ол мұндай ақпаратты таныстарынан және жедел жәрдем жүргізушісі болып істейтін күйеуінен жасырын сұрап білген.
Сондай-ақ, әйел Қарулы күштердің бекініс орындары мен қосалқы командалық пункттерін анықтауға әрекет жасаған. Бұл координаттарды ол өз кураторы арқылы беріп отырған.
СБУ қызметкерлері ақпараттың жауға жетуіне жол бермей, агент әйелді ұстады. Тінту кезінде оның барлау деректерін жинап, ГРУ-мен байланысқа шыққан смартфондары мен планшеттері тәркіленген.
Әйелге «әскери жағдай кезінде жасалған мемлекеттік опасыздық» бабы бойынша (ҚК 111-бабы, 2-бөлім) күдік келтірілді. Оған мүлікті тәркілеумен бірге өмір бойына бас бостандығынан айыру жазасы кесілуі мүмкін.
Бұған дейін осы аптада Донецк облысында ресейлік ГРУ-дың екі агенті ұсталған болатын. Олар жауға Краматорск пен Славянск қалаларын атқылауға көмектескен.
Ал бір күн бұрын Одессада Ресей арнайы қызметіне жұмыс істеген ерлі-зайыпты ұсталып, олардың әскери қызметкерлерге қарсы теракт дайындағаны белгілі болды.
