Ақтөбе облысында Қандыағаш қаласының әкімі Қазбек Аққайыр әйелді соққыға жыққаны үшін кінәлі деп танылды. Сот оған 314 560 теңге айыппұл салды, деп хабарлайды Arasha.kz.
Іс қаралып жатқан кезде, үйлі-баранды шенеунік көңілдесі болғанын мойындады, бірақ ұрмағанын айтты. Сондай-ақ ол «оның салдарын отбасымның алдында тартып жатырмын» деп мәлімдеді.
Аққайыр өз әрекетіне өкінетінін айтып, тіпті Қасым-Жомарт Тоқаевтың сөзін келтірген:
«Президент әйелдердің ішінде айғайлап, ұрыс шығарып, қоғамдық тәртіпті бұзатындары бар екенін айтқан. Ондай әйелдер бізде де, Қандыағашта да бар», — деген ол.
Дегенмен сот Қазбек Аққайырды әйелді ұрып-соққаны үшін кінәлі деп таныды. Ол 314 560 теңге айыппұл төлейді. Сонымен қатар бұрынғы сүйіктісіне 100 000 теңге моральдық зиян өтемақысын және сонша мөлшерде адвокат шығынын өтеуге міндеттелді.
