Шымкентте Nazira Gold қаржы пирамидасын құру және басқару ісі бойынша үкім шығарылды, деп хабарлайды ҚР Қаржы мониторингі агенттігінің (ҚМА) баспасөз қызметі.
«Шымкент қаласында Nazira Gold қаржы пирамидасын құру және басқару ісі бойынша үкім шықты. Тергеу Шымкент қаласы бойынша ҚМА департаментімен жүргізілді», — делінген хабарламада.
ҚМА мәліметіне сәйкес, ұйымдастырушылар өз қызметін зергерлік бұйымдарды сату ретінде таныстырып, салымшыларға салынған соманың ай сайын 20–40%-дық кірісін уәде еткен. Алайда төлемдер жаңа қатысушылардан тартылған қаржы есебінен жүргізілген.
Осы схемаға 4 мыңнан астам салымшы тартылған. Ұйымдастырушылар алынған ақшаны көлік сатып алуға, жер учаскелері мен жылжымайтын мүлікке жұмсаған.
Сот үкімімен тоғыз фигурант кінәлі деп танылып, 5-тен 10 жылға дейінгі мерзімге бас бостандығынан айырылды.
Сонымен қатар, сот 402 миллион теңге, 52 көлік, жеке үй, екі пәтер (қымбат тұрғын үйлерде) және 17 келі зергерлік бұйымдарды тәркілеуді белгіледі.
