Өскеменде Қылмыстық-атқару жүйесінің бір мекемесінде оқ атылаған оқиға болды, деп хабарлайды Arasha.kz.
«Бөгде адамдар тыйым салынған заттарды (тоғыз түйіншекті) сыртқы қоршаудан асырып лақтырған. Оның жетеуі тұрғын аймаққа түсті, бірі техникалық жолаққа құлады, тағы бірі негізгі қоршаудың элементтеріне ілініп қалған. Сол қоршауда тұрған тыйым салынған затты түсіруге әрекеттеніп, төрт сотталушы айла қолданып ішкі тыйым салынған аймаққа кіріп кеткен. 6699 әскери бөлімі постының қарауылшысы дер кезінде “тоқта, кейін!” деп бұйрық беріп, қарауыл бастықтарына дереу баяндап, ескертуін қайталады: “Тоқта, кейін! Тоқта, атамын”. Қарауылшының талабына қарамастан, сотталушылардың бірі негізгі қоршауға өрмелей бастаған. Нұсқаулыққа қатаң сәйкес әрекет еткен қарауылшы ескерту ретінде аспанға оқ атты», – деп хабарлады өңірлік «Шығыс» Ұлттық гвардия қолбасшылығының баспасөз қызметі.
Айтуларынша, әскери қызметшінің шешімді әрі сауатты әрекеттері режимді бұзудың ары қарай ушығуын және заңсыз әрекеттерді тоқтатуға мүмкіндік берген.
«Қырағылық, кәсібилік және шешім қабылдаудағы батылдығы үшін әскери қызметшіге 10 тәулікке үйіне демалыс берілді», – деп қосты мекеме.
Мұндай оқиғалар колониядағы тәртіп шеңберінің қандай да бір сәтте сынаққа түсіп қалатынын еске салады.
