Америка-израильдік Stardust Solutions стартапы жаһандық жылынуды бәсеңдету үшін Күн сәулесін «әлсірететін» технология әзірлеп жатқанын мәлімдеді, деп хабарлайды Arasha.kz.
Politico жазғандай, компания арнайы шағылыстыратын бөлшек жасап, оны атмосфераға миллиондаған тонна көлемінде шашу арқылы күн сәулесін азайтуды көздеп отыр.
2024 жылы стартап БҰҰ-ның бұрынғы жоғары лауазымды климат маманы Янош Пасторға жүгінген. Жоба ауқымына таң қалған сарапшы бастапқыда кеңесші ретінде қосылғанымен, кейін компанияның ашықтық жөніндегі ұсыныстарын орындамағанын айтып, ынтымақтастықты үзді.
Ғалымдар мұндай технология атмосфераға жасанды «шаң қабатын» енгізу арқылы жылынуды уақытша тежеуі мүмкін екенін бұрын болжап келген. Бірақ оның салдары — ауа райы жүйесінің бұзылуы, азық-түлік тізбегіне әсер ету, геосаяси шиеленіс — толық зерттелмеген. Әлемде мұндай технологияны реттейтін халықаралық нормалар да жоқ.
Бұған қоса, Politico зерттеуі компания сайтында іздеу жүйелерінен жасыратын код болғанын анықтады. Стартап мұны «қателік» деп түсіндірді.
Ғалымдардың айтуынша, климаттың күрт нашарлауы өзекті болып тұрғанда бұл технология соңғы амал болуы мүмкін, бірақ тексерілмеген жүйенің коммерциялануы алаңдаушылық тудыруда.
