Астана мәслихатының отырысында жол кептелісіне қатысты жағдайды жақсартудың бір нұсқасы айтылды, онда қала маңындағы елді мекендердің тұрғындарына көліктерін елордаға кіреберіс жерлерде қалдыру ұсынылды, деп хабарлайды Arasha.kz.
«Бізде кешенді бағдарлама аясында көлік ауыстырып міну пункттері қарастырылған. Бұл өте жақсы тәсіл, ол Еуропада да, басқа елдерде де жұмыс істейді.
Мысалы, адамдар Қосшыдан немесе Қояндыдан келгенде, олар іске қосылатын LRT-ға немесе қоғамдық көлікке ауысу нүктесіне дейін жетіп, өз көлігін сол жерде қалдырып, әрі қарай кете алады. Бұл әрі арзан, әрі жылдам, сонымен бірге қала ішіндегі жол желілерін жеңілдетеді», - деп мәлімдеді мәслихат депутаты Владислав Сергеев.
Ол кешенді бағдарлама Астанадағы көлік жағдайын жақсартуға бағытталғанын атап өтті.
Жақында өткен жиындардың бірінде Астана әкімі Жеңіс Қасымбек елордадағы негізгі мәселе трафик болып отырғанын, қала ішіндегі кептелістер жоғары балға жеткенін мойындаған болатын.
