Қару-жарақ сату және сақтау, бопсалау, ұрланған автокөліктерді заңдастыру және басқа да қылмыстарға қатысы бар бірқатар қылмыстық топтардың жолы кесілді. Бұл туралы Ұлттық қауіпсіздік комитетінің (ҰҚК) баспасөз қызметі хабарлады.
«2026 жылғы 4 ақпанда ҰҚК Ішкі істер министрлігімен бірлесіп, Бас прокуратураның үйлестіруімен қару-жарақ сату мен сақтауға, бопсалауға, ұрланған көліктерді заңдастыруға және өзге де қылмыстарға қатысы бар бірқатар қылмыстық топтардың әрекетін тоқтату бойынша арнайы операция жүргізді. Барлығы 20 адам ұсталып, оның 10-ы уақытша ұстау изоляторына қамалды», — делінген жұма күні таратылған хабарламада.
Жедел іс-шаралар бір мезгілде Алматы, Шымкент қалаларында, Ақтөбе, Алматы, Шығыс Қазақстан, Жамбыл облыстарында, сондай-ақ Абай және Жетісу облыстарында өтті.
ҰҚК мәліметінше, тінту жұмыстары кезінде күдіктілерден атыс қаруы, оқ-дәрілер, есірткі заттары, ірі көлемдегі ақша қаражаты және басқа да заттай дәлелдемелер алынған. Қазіргі уақытта сотқа дейінгі тергеу амалдары жүріп жатыр.
«Қылмыстық-процестік кодекстің 201-бабына сәйкес, өзге ақпарат жария етуге жатпайды», — деп түйіндеді комитет өкілдері.
