Бүгінгі таңда әлеуметтік желілер тек ақпарат алмасу құралы ғана емес, сонымен қатар заң алдындағы жауапкершілік аймағына айналды. Абай облысында TikTok платформасын теріс мақсатта пайдаланып, тыйым салынған идеологияны насихаттаған азаматқа қатысты сот үкімі шықты, деп хабарлайды Arasha.kz.
Тергеу мәліметтеріне сүйенсек, Семей қаласының тұрғыны 2024 жылдың шілдесінен 2025 жылдың сәуіріне дейін TikTok желісінде бірнеше анонимді аккаунт ашып, белсенді жұмыс істеген. Ол Қазақстан аумағында қызметіне тыйым салынған «Ислам мемлекеті» халықаралық террористік ұйымының идеологиясын ақтаған материалдарды таратумен айналысқан. Оның үстіне, заңсыз насихат тек виртуалды әлеммен шектелмей, азаматтармен жеке кездесулер мен әңгімелесулер барысында да жалғасын тапқан.
Семей қаласының қылмыстық істер жөніндегі ауданаралық соты істің барлық мән-жайын мұқият қарап, айыпталушының әрекетінде қылмыс құрамы бар екенін растады. Мәтіндер мен видеоларға жүргізілген сараптама олардың зорлық-зомбылық идеологиясын қамтитынын және терроризмді жария түрде ақтайтынын көрсетті.
Сот үкімімен азамат Қылмыстық кодекстің 256-бабының 2-бөлігі бойынша кінәлі деп танылып, 7 жыл мерзімге бас бостандығынан айырылды. Қазіргі уақытта үкім заңды күшіне енді.
Осы оқиғаға байланысты Абай облысының прокуратурасы тұрғындарға арнайы үндеу жариялады. Құзырлы орган өкілдері интернеттегі кез келген күмәнді ақпаратқа абай болу қажеттігін еске салады.
«Террористік немесе экстремистік мазмұндағы материалдарды тарату, оларға репост жасау, тіпті смартфон немесе компьютер жадында сақтау үшін қылмыстық жауапкершілік қарастырылған», — делінген ресми хабарламада.
Мамандар азаматтарды желідегі ақпараттардың мазмұнына жауапкершілікпен қарауға және осындай заңсыз деректерді кезіктірген жағдайда дереу құқық қорғау органдарына хабарлауға шақырады. Бұл жағдай желідегі «анонимдік» пен «еркіндіктің» артында нақты заң мен жауапкершілік тұрғанын тағы бір мәрте дәлелдеді.
