Қазақстандық боксшы Абылайхан Жүсіпов украиналық "Миротворец" сайтының дерекқорына енгізілді. Спортшы туралы мәлімет ресурста 22 қыркүйекте жарияланған, деп хабарлайды Arasha.kz.
РИА Новости басылымының жазуынша, Абылайхан Жүсіповті Ресейге қолдау білдірді және Украинаның аумақтық тұтастығына қарсы әрекеттерді қолдады деп айыптайды. Бұл – аталған ресурстың өз бағасы мен тұжырымы.
Жарияланған мәліметке сәйкес, бұған қазақстандық боксшының World Boxing президенті Геннадий Головкинге қолдау білдіруі себеп болған. Жүсіпов спорт пен саясаттың ара-жігі бөлек болуы керек деген пікір айтқан.
Ол спорт адамдарды біріктіріп, достық пен өзара құрметке қызмет етуі тиіс екенін жеткізген.
"Миротворец" әр жылдары әртүрлі елдердің қоғам қайраткерлері, журналистері, мәдениет өкілдері мен спортшылар туралы мәлімет жариялап келген даулы украиналық ресурс ретінде белгілі.
Айта кетейік, World Boxing халықаралық ұйымы қазір Азия ойындары аясындағы жарыстарды да өткізіп жатыр. 29 қыркүйектегі ресми мәлімет бойынша, Қазақстан құрамасының өкілі Айбек Оралбай +90 келі салмақта финалға шыққан.
