Қазақстан құрамасының спортшысы Вадим Шарлаимов Швейцарияның Берн қаласында өтіп жатқан семсерлесуден әлем кубогының кезеңінде қола медаль жеңіп алды. Отандасымыз шпагамен семсерлесуден ерлер арасындағы жекелей сында үздік үштіктің қатарына енді, деп хабарлайды Arasha.kz.
Қазақстан Республикасы Ұлттық Олимпиада комитетінің мәліметінше, Вадим Шарлаимов халықаралық жарыста сәтті өнер көрсетіп, жартылай финалға дейін жеткен. Осылайша, қазақстандық спортшы әлем кубогы кезеңінде кемінде қола жүлде алуды қамтамасыз етті.
Финалға шығу үшін өткен шешуші кездесуде Шарлаимов Венгрия құрамасының өкілі Гергей Шиклошимен күш сынасты. Алайда жартылай финалдық бәсекеде венгриялық семсерлесуші басымдық танытып, 15:4 есебімен жеңіске жетті. Нәтижесінде Вадим Шарлаимов финалға өте алмады. Дегенмен ол жарысты үшінші орынмен аяқтап, қола медаль иеленді.
