Каспий мұнайының Қара теңіз арқылы экспортталуы Ресей президенті Владимир Путиннің жаңа жарлығының салдарынан уақытша тоқтатылды, деп хабарлады Reuters агенттігі.
«Сәрсенбі күні салалық екі дереккөз шетелдік мұнай танкерлеріне Ресейдің Қара теңіздегі ірі порттарында жүк тиеуге уақытша тыйым салынғанын мәлімдеді. Бұл – Каспий құбыр консорциумы арқылы жүзеге асырылатын, құрамында америкалық энергетикалық алпауыт компаниялар бар бірлестік тасымалдайтын Қазақстан мұнайының экспортын іс жүзінде тоқтатты. Reuters агенттігінің өңірдегі тиеу көрсеткіштеріне сүйене отырып жасаған есебіне сәйкес, шетелдік кемелердің Новороссийск портындағы жүк тиеу жұмыстарына қатыса алмауы әлемдік мұнай жеткізілімі көлемінің 2%-дан астамын құрауы мүмкін», – делінген хабарламада.
Бұл жағдай Еуропалық одақтың Ресейге қарсы жаңа санкциялар енгізіп, Chevron және ExxonMobil сынды компаниялар үлесі бар Каспий құбыр консорциумының (КҚК) қызметін қиындатқаннан бірнеше күн өткен соң орын алды.
«КҚК Қазақстан мұнайының 80%-дан астамын тасымалдайтын құбыр, ол арқылы Ресейдің "Оңтүстік Озерейка" терминалына жеткізіледі. Дүйсенбі күні президент Владимир Путин шетелдік кемелердің Ресей порттарына кіруі үшін ФСБ-ның (Ресей Федералдық қауіпсіздік қызметі) рұқсатын талап ететін заңға қол қойды. Жарлықта порт билігінің шетелдік кемелерді қабылдауына тек ФСБ-мен келісілген жағдайда ғана рұқсат берілетіні көрсетілген. Бұл жаңа талаптар жарлық жарияланған сәттен бастап күшіне енді», – деп нақтылайды агенттік.
Агенттіктің мәліметінше, КҚК және Ресей Көлік министрлігі экспорттың тоқтатылуына қатысты пікір білдіруден бас тартқан.
«Салалық дереккөздердің бірі порттардағы жағдай бір-екі күн ішінде шешіледі деген пікір білдірді», – делінген хабарламада.
БАҚ мәліметі бойынша, КҚК-ның Ресейдегі терминалынан экспортталатын Black Sea CPC Blend мұнайының тамыздағы көлемі тәулігіне 1,66 млн баррельді немесе шамамен 6,5 млн тоннаны құрайды. Бұл көрсеткіш шілде айындағы жоспармен шамалас.
«Салалық дереккөздерге сүйенсек, шілде айында Новороссийск арқылы экспорт және транзиттік тасымал көлемі шамамен 2,2 млн тоннаны құрады. Жерорта теңізі мұнай нарығы соңғы күндері Әзірбайжан мұнайын Түркиядағы Джейхан портынан жөнелтуде болған кідірістерге байланысты уайымдаулы күйде. Сонымен қатар, ақпанда КҚК-ның сорғы стансасына жасалған дрон шабуылы салдарынан және сәуірде Ресейдің Қара теңіздегі терминал өткізу қабілетін уақытша шектеуі салдарынан да КҚК жұмысы бұзылған болатын», – деп қорытындылайды материал.
