ҚР Премьер-Министрінің орынбасары Қанат Бозымбаев Солтүстік Қазақстан облысына жұмыс сапары барысында өңірдегі су тасқыны жағдайымен танысып, тасқынға қарсы шаралардың орындалуын тексерді.
Вице-премьер Есіл өзені арнасы бойындағы су тасқынына бейім аудандарды қарап шықты. Сондай-ақ, ол Сергеев су торабына барып, Қызылжар ауданының Прибрежное ауылы, Петропавлдағы Ущев көшесі және Биотоған бөгеттерін нығайту жұмыстарын тексеріп, Заречный кентіндегі саяжайлар мен айналма каналды қарады.
Өңірде су тасқыны кезеңіне дайындық бойынша кешенді жұмыстар жүргізілді. Петропавл және Қызылжар ауданындағы 8 қорғаныс бөгеттері нығайтылды. Бөгеттер бетон плиталармен және полипропилен жабындарымен бекітілді, бұл елді-мекендерді қорғауға мүмкіндік береді.
«Қазір Сергеев су қоймасында екінші толқын байқалуда. Петропавлда бірінші толқынның шарықтау шегі 5-6 сәуірге жоспарлануда. Саяжайлардан тұрғындар эвакуацияланды. Айналма жолдағы судың асып төгілуі тіркелді, ол жерде тәулік бойы кезекшілік қойылды. Заречный кенті біздің назарда. Жағдай тұрақты бақылауда», — деп жазды өңір басшысы Ғауез Нұрмұхамбетов әлеуметтік желіде.
