Дания, Нидерланд және Норвегия АҚШ-пен бірлесіп Украинаға қару-жарақ жеткізу туралы келісімге қол қойды, деп хабарлайды Arasha.kz.
Келісім аясында Пентагон Киевке әуе-жер класына жататын ERAM зымырандарын береді. Бұл қару түрі құрлықтағы нысандарды қашықтықтан жоюға арналған. Украинаға сондай-ақ GPS пен INS навигация жүйелері және сигналды қорғауға арналған арнайы модульдер жеткізілмек.
АҚШ Мемлекеттік департаменті келісімді ресми түрде мақұлдап, оның жалпы құны 825 миллион долларды құрайтынын мәлімдеді. Бұл соманы толықтай Дания, Нидерланд және Норвегия төлейді.
Жалпы алғанда, Украинаға 3 мыңнан астам ERAM зымыраны беріледі. Олардың ұшу қашықтығы – 250 шақырымға дейін, алайда 460 шақырымдық үлгілері де жеткізілуі мүмкін.
Айта кетейік, бұған дейін Киев 850 млн долларға 3350 зымыран сатып алуға өтініш жасаған болатын. Сарапшылардың пікірінше, жаңа келісім нәтижесінде Украина 825 млн долларға шамамен 3 мыңнан астам зымыран алады.
