12-11-18 |
1760 рет қаралған
Роскосмос: 2020 жылға қарай «Союз» кемелерін ұшыруды тоқтатамыз
.
Роскосмос корпорациясы 2019 жылдың соңынан бастап «Союз-ФГ» зымыран тасығышын пайдалануды тоқтатады. Бұл туралы корпорация басшысы Дмитрий Рогозин Twitter-де хабарлады. Оның сөзінше, 2020 жылдың қаңтарынан бастап «Союз МС» ғарыш кемелері «Союз-2.1.а» зымыран тасығышымен ұшырылады.

Рогозин сонымен қатар орташа класты «Союз-5» зымырандарын 2022 жылдан бастап сынақ ретінде ұшқышсыз ұшыру, ал 2023 жылдан бастап жаңа «Федерация» кемесін ғарышкермен бірге ұшыру жоспарланып отырғанын хабарлады. Жаңа зымыран мен ғарыш кемелері Байқоңыр ғарыш айлағынан ұшырылмақ.

Қазанның 11-і күні Байқоңыр ғарыш айлағынан Халықаралық ғарыш станциясына ұшырылған «Союз-ФГ» зымыран тасығышы әуеге көтерілгеннен бірнеше минуттан соң апатқа ұшыраған. Зымыран тасығышқа тіркелген «Союз МС-10» ғарыш кемесі халықаралық станцияға ресейлік ғарышкер Алексей Овчинин мен америкалық астронавт Ник Хейгті жеткізуі тиіс болған. Апаттан соң ғарышкерлер отырған капсула Байқоңырдан шамамен 500 километр қашықтыққа қонған. Роскосмос мәліметінше, апат зымыранның бірінші және екінші басқышын ажырататын датчиктің дұрыс жұмыс істемеуінен болған.

Azattyq.org

БӨЛІСУ:
  • twitter
  • telegramm
  • facebok
  • vk
Соңғы мақалалар.
МІНБЕР.